LOVE LETTER

- Lalthuthlung Thara

             Lungngaihngaihna leh harsatna tamtak karah bawrhsawmna in ka taksa a bu akhuar mek laite,awmlai  nunrawng in kan run a thla a zar mek lai leh khawvel a ka hlimni ber Krista a nunthar ka neih ve mek lai pawh a ka theihnghilh ngai loh Rohlupuii.
   
    A hmasa in he sual tam tak khawih thin ka kut bawlhhlawh tak leh tlinglo tak hmang ngei a i chawnban a vuan chung ngei a,Chibai che chu chak viau mah ila,kan hun tawnin a zir ngang  siloh a vang in Kutsuih loh Chibai kabuk a che.
   
    Thangril zanmu ka chin dawn apiang leh zing khua a var a bawh-ar zai ten min kaihthawh a pianga i tan ka tawngtai ziah thin avang tal pawh in i damlai anih ka beisei.Sawitur tamtak karah zak tak chung leh insit chung chung a i laka ka rilru put hmang leh ka veizia che hi hrilh che duh viau mah ila,keini ang dinhmun a ding tan chuan i laka beisei han nei ngam chi kan ni silova.Mahse miten i chanchin an sawi a pianga an sawi tel thin, ‘ A ni chu a hmel a tha,a pian a nalhsi,a felsi,a zeia,azaidamin a nungchang a mawi ani’,tia thudik ziktluak lova an sawi che  ka hriat chang hian,i nihna diktak zawk hrilhfiah turin heng an sawina tlar tinah hian, ‘ CHUNG CHUANG ’ tih kalo belh thin a sin.

    Mahse,i mitmeng mawi tak te,i ha var rual siau mai tuammawitu i heh sen nochek maite hmanga he ka lehkha tlinglo tak,mahse Bibble tih lovah chuan khawvel a thudik hlang chuanna ni si hi i han chhiar hun ah chuan, ‘ Chutiang ka ni hleinem’I ti leh ngei ang,chu chu i nunmawi takin a ken tel i inngaihtlawmna vang ani si a.Heng thudik tlawngawl ringawt rawn hrilh tur che a i hun hlu tak rawn tihbuai chu ka hreh hle mai a,mahse heng i mawina leh thatna zawng zawng te hi ka mitah chuan ennawm ropui tak,sawiloh theihloh a nisi a,ka tlinloh zia min hriattir thintu a nih a vang erawh chuan ka tan beidawnna thlen thintu a ni si.

    Mite chuan an duhber ten an hmangaih let ve theihna turin thilpek hlu tak tak an hlan thina,kei erawh chuan pek tur che ka nei velo,ka thinlung erawh i ta a ni e.An hmangaihte tan chuan si-ar lak pawh an huam hial thin a,mahse keichuan ka zuam ve thlawt lo ani,ka thei dawn chuang silova.mahse, ka theihna zawng zawngin a nuamah leh hreawmah pawh kan dam dun chhung chu duat taka enkawl tur che chuan ka in huam reng a ni.Bakah, theihchang tehreng pawh nise i tana si-ar la tur chuan a zinkawng athui dawn em a,i tellova thangvansang kai chu ka zuam mawlh lo a ni.Nangmah thlahlel ngawih ngawihtu tan chuan i tellova darkar khat hman hian Millennium a tluk a,chhingkhual a i cham chhung  ringawt pawh hi chatuan vawithum inher tawh ang mai ani.
   
    Krista ringtu te tan,a thu thianghlim in a mintiam ‘ thiltihtheihna’ chak tak,tlang sawn theihna hial pawh a awm a,keipawh ka rinna hian ‘’Antamchi’ tal pawh tiat se zawng  i lenna tlang hi ka kiang hnai ah ka sawn ngei ang.Mahse,rinna kawngah ka pianna a la rei loh em a, min hrethiam ang che.

Tunah i sakruang tawng lo mah ila,i sakhmel hlimthla chu ka thinlungah nemkai ani tawh a,thaibo a ni tawh lovang,a option ah delete a awm ve silo.Tawngtaina hian thil a tithei a, ka taksa thlenphak loh ram pawh a fan theih a vangin keipawh chumi hmang chuan i kiangah ka awm reng thin asin,pawi i tilo ang tiraw.I hlim hian ka lawm a,i lungngaih ni ah pawh ka tahpui ang che,ka nunna hial pawh itan chuan ka uilo asin..

    Mahse engtiang pawhin ka lawmnaber nila,ka thinlung zawng zawng leh  ka nunna pawh itan peta che ila,he ka rilru leh ngaihtuahna te hi mi hriatpui siloh chuan i tan awmzia ka nei dawn chuang silova,’mizo tlangval thian chhan thih ngam’ ka ni satliah ngei ang.Nangmah vanga lunglen ka tawrhnate leh a rukte a ka veizia che hi ka tlinloh vang leh zahna vang mai a ka hrilh ngam loh che chuan suihlungchhirin  itan khua ka tlai ngei ang.Chuvangin keimah leh keimah ka in zahpui avanga nang ka chan dawn ai che chuan, i kianga mualpho ka rawn thlang ta  zawk  a ni e.

    Mahse heng ka sawi tak zawng zawng te hian  ka thinlung chhungrilber pawh an hrilhfiah zo dawn siloh a vangin ka thiam ang tawka ka ‘ HMANGAIHNA’ ka rawn hlan na ah che min lo ngaihsak dawn nia

    A tawpber atan he lehkha hi ka chhungrilber ka phawrhna a nih avangin min tihmualpho sak lo hram ang che.Tin,keipawh’n ka mi rin em em Buata a rawn zin remchang hlauh a,hei ka rawn kentir ani e...a ute inah a thleng dawn a,kan veng news te i hrechak maithei a,ilo zawt dawn nia,zirtawp niah a lo haw leh ang.

    Tin,Biakhluna’n itan lehkha a thawn ve tih ka lo hria a,a ni chu pawmlai nei a ni tawh tih ilo hre dawn nia
                     

Tawk maise,tawn leh hma zawng atan Mangtha le…

I chhanna duhawm nghak rengtu,
Ramnuna