HLAWHTLINNA THURUK ‘D’ PATHUM

K. Liantluangi, Lily veng, Aizawl.

    ‘Kan nunah hian engnge kan duh ber ang aw’ tih hi ka ngaihtuah fo \hin. Engkimah hlawhtling a, thuneihna (Power) neih hi kan duh ber kan ti thei awm e. A dik thui ngawt mai. Thuneihna hi a hlu a, kan duh a, thlakhlelhawm tak pawh a ni e. Thuneihna kan neih lohna hmunah chuan, in ropui takah pawh ni rawh se, kan ngampa ngai lo. Ei tur tui tak tak awmna hmun pawh nise nuam kan ti chuang lo.
    Ram rorêlnaah pawh heti taka kan \anna chhan, ‘Kan Party chak ila, a fawng chelh ve ila’  kan tih chhan pawh eng dang a ni lo. Thuneihna chelh ve, neih ve kan duh vang a ni ber. Chutiang bawkin Mo pawhin inpui a\anga indan a, awm hran a chuh ve na chhan pawh eng dang a ni lo, ‘Thuneih’  a duh ve tawh a, mahnia ‘ar talh’ theih ve a duh tawh a ni mai awm e. Chutiang tak a nih avang chuan ‘thuneihna’ chu thil duhawm tak leh thlakhlelhawm tak a ni ngei mai.

     Amaherawhchu, hlawhtling a, thuneihna nei tur chuan rahbi tam tak pal tlang a ngai a, thil tam tak hmachhawn tur a awm. Hnam dang tawng han hawh ve ta ila, ‘D’ pathum – Dedication (Inpekna), Discipline (Inthununna) leh Determination (Tumruhna) – te hi ka sawi duh chu a ni.

    A hmasa berah chuan Dedication (Inpekna) hi a pawimawh hle. Zirlai kan ni emaw, eng thil emaw tiin kan training emaw, dawr kan kai a ni emaw, eng pawh ti ila, kan thil tihah inpek a ngai. Hlawhtling tur chuan kan thil tih mek leh kan tihna apiangah rilru leh ngaihtuahna senga inpek zawh a ngai em em mai. Kan thil tih reng reng engto tak takna awm lova kan tih chuan hlawhtlinna chu a hla khawp ang le.

    A dawt lehah chuan Discipline (Inthununna) neih hi hlawhtlinna thuruk a ni. Mahni inthunun thei lote an hlawhtling ngai lo. Zuk leh hmuam, hun vawn, ei leh in leh thil dang danga inthunun thei mi an hlawhtling fo \hin. Thil eng pawh kan hmaa tih tur awm hmachhawp, hlawhtlinna tura kan beih eng pawh hi inthununna tha tak nena kan bei a nih ngat chuan hlawhtlin lohna tur a awm lo.

    A tawp berah chuan Determination (Tumruhna) neih hi hlawhtlinna thuruk pakhat chu a ni leh. Mi tum ruh takte chuan hlawhtlinna an dawng \hin. Zirlai chu a thiam emaw, thiamlo emaw pawh nise, tumruhna nen lehkha a zir chuan, chu chuan a ti pachangin a tichhel, chutiang mi chu an hlawhtling nge nge \hin. ‘Chumi khami chu ni ve ngei turin kan bei ve teh ang’ titu chu a tumruhna khan hlawhtlinnaah a hruai lut fo \hin. Thluak \ha, zirna hmun \haa zir, sumleh pai ngah, mahse tumruhna nei ngailo mi chu a hlawhtling ngai lovang.
    Tichuan kan dam chhung kan hman chhoh mêknaah, eng mi pawh niin, eng dinhmunah pawh ding ila, ‘D’ pathum kan sawi tak te khi kan nunah kan neih a, kan vawn a, kan zawm tlat chuan kan lo hlawhtling dawn a ni.