DUHTHLANNA DIK

LR. Chhuanwma   ‘A’ Section 

Van hnuai mihring fate dam chhung tawite a kan hringnun hman dante hi ka ngaihtuah ve mai mai \hin a, ‘duh thlangin kan buai’’ ni ber hian ka hre \hin.  Nun thawveng leh zalên neih kan duh a, chumi nei tur chuan hma lam panin kan kal tauh tauh a. He hlimna kan zawnna kawngah hian kawng ral\i leh suar chhia paltlang ngai a awm fo \hin. Hma lam pan ngam lovin kan awm fova, tluk leh din fawmkemin hringnun hahchawlhna zawngin hma lam kan pan hram hram \hin a nih hi.
    Hun a thar zel angin, he kan chenna khawvel pawhin hmasawnna rahbi thâr a chuang kai ve zel a, thiamna leh finnate chu a kala kal mai lovin a zuanin a zuang dawrh dawrh tawh mai a ni. Thil thâr pawh a thâr rei thei tawh lova, a thâr dang a lo chhuak zung zung a, nimina thil thâr leh mite duh em em kha vawiinah chuan a ‘\hing’  leh hman tawh a. A thâr tha leh tunlai apiang kan bawh a, duh kan thlang vut vut mai \hin a ni. Tichuan kan duh leh ît zawngte hriain khawvela company hrang hrang sum leh paia tuihal hote  chuan kan inchhung khûr ngeiah ennawm khawvel hmangin min run ta hem hem mai. Thil thâr chitin reng, mawi leh nalh tak takte chu, tunlai leh \ha ber angin, mite mit la thei ang ber tura duang chhuakin an thil siamte chu an tarlang a. Chung advertisement  chi hrang hrangte chuan kan ngaihtuahna  leh duhthlanna chu a kaihruai a, chu chuan mihring rilru dik tak ‘chin lem neih lohna’ chu a rawn kai harh a. A tha, a mawi, a tunlai ber neih duhna chu kan thinlungah rawn tuhin “Lei la, lei la, lei zel rawh”  tiin min thlem ta heuh heuh mai a ni.

    Hetianga thil inthlak danglam zung zung karah hian eng hi nge ngaihhlut tur ni a, eng ber hi nge kan nun pumpui tan hian pawimawh hmasa tih hriatthiam a harsa tawh \hin. Tunlaiah pawh tunlai thei ang bera khawsak tumte phei chu an buai zual a. Duh thlang, thlang sual fê fê lah an tam; an thlan sual tuarin an rum fo \hin a ni. Hetiang hun a lo thlen tawh hi chuan innghahna tur rin tlak, hun leh nun danglam zel karah pawh danglam ve mai mai lo kan nunin a mamawh \hin a ni. Nimahse, duhâmnaa khat hringfate hian kan \hatna turin kan nunin innghahna rintlak a mamawh a ni tih ngaihtuah chang lo lekin nun hlimna kan zawng a, chumi um chuan kan tlan a. A tirah chuan hlimawmin nuam viau mahse, chung kan duh leh kan ît-te, kan thlakhlelh thilte chuan rei a daih mawlh silo. Mi tam takin an nun an tih chhiat phah a, an tichhe mek bawk. Lungngaihna leh rumna an insiam chawp a, an pang tinatu tam tak an insiam ta \hin a ni.
    Lei mihring awm tirh ata vawiin thlengin, duh thlanga buai hringfate hian a \ha ber kan la thlang fuh thei lo ni berin a lang. Tunlai fashion hmanga inawmtlei kan tum a, a tunlai ber ber kan thing chhuak a, kan ti zuih a, kan ti arh leh a. Kan feng fual a, kan feng chhing leh a. Handset changkang pui pui kan lek fer fur a, kan inneih changkan siak a. Tin, tlangval hovin an kekawr kap an pawh fual laiin nulate chuan an kekawr kap an lo ti tawi ve thung a, tlangval ten T-shirt lian lam an uar laiin nulate ve thung chuan lai langin kawr an lo ha ve mek bawk. Kan nula leh tlangvalte incheina hi ngaihthah mai chi a ni ta lo! Kan nulate pawhin jeans tawt tak, a kap tawi leh kawr lai lang hak kha an bansan leh \an tawh a, chu aiah chuan kekawr tlawn dum tawt tak leh kawr fual mawng khuh \awk \awk hak an ching leh \an tawh. Mi \henkhat chuan “Nakin lawkah chuan an kawr fual tih fual belh chuang lovin, an kekawr, an kawr fual hnuai ami chu hlipin mawng langin khawlai an la leng ang...”  te kan ti liam mai mai pawh a ni mai thei. Mahse kan hmeichhiate incheina inthlak mek zel hi ngaih thah mai chi a ni lo. Chtiang bawkin kan tlangvalte incheina inthlak danglam mek pawh hi en liam mai chi niin a lang bik lo. Kekawr dawr fual leh T-shirt lianpui ha chunga bek kawng ruta lumeh kha an bansan leh tawh a, chu aiah chuan lu zuah thur chunga kawr te tak leh kekawr tlawn zuih hak an ching leh hle tawh. |halaite thawmhnaw hak duh zawng leh an inchei duh dan hi pawm liam mai theih chi ni pawhin a lang ta love; ngaihtuah hmanhmawh a ngai a ni.
    Kekawr kap tawi, a hma lam lâi hnuai size hriat theih leh hnung lama ngum hnuai lam, comode culvert  lang ruaha incheite leh, kawr fual mawng khuh dawr dawr hnuaia stoking ha chunga lengte hian, khaw eng leh khawlai nun zahpah lova fashion changkang inbel ni a inngaih tlatna phen a sex symbol  lantir hrehlo nula te hian zaktheilo emaw, incheina ûchuak inbela inngai lovin, sexy tak.... tlangval a\anga paho thlengin, mipa fa tawh phawt chu chilputa siam hi pawi an tilo a ni satliah lova, ropuina chikhatah an ngai tawh zawk a ni.
    Ngaihhlut tur dik tak pawh ngaihtuah chang lova duh leh chak zawng uma tlan mek, \halaite nun hi thlir liam mai chi a ni ta lo. Eng nge a chhan ni ta ang le? Kan nun thlak danglamtu leh ûchuak taka min siamtu hi kan zawnchhuah a ngai a ni. Kan incheina ngawr ngawr kan sawi dawn chuan mi tam tak chuan “Hengte chu tunlai fashion a nia, kei ni tih danglam theih a ni hleinem”  kan ti a ni mai thei. Chuti a nih chuan eng nge kan tih theih ni ta ang? Nu leh pate kan puh vek mai dawn em ni? Nu tam tak chuan a ruka hak an chak, a taka an hak ngam siloh an fanute an hak tir fova, party dress-a an fanute cheiin khawlai an lenpui dawklak a. An lo tleirawl a, ûchuak taka inchei chunga tuallai len an ching ta mai a ni lawng maw? Tin, nu leh paten fate tana changkanna leh tunlaina kan um nasat lutukna hian, Cell phone, computer, Bike, Car, min chhawp chhuah sak a, mamawhna leh atangkaina inzirtir aia rualpawl duhna thinlung hian thalaite nun a eichhe mek a ni kan timai dawn em ni? Nu leh pate kan mawh chhiat dawn chuan sawi tur tam tak chu a awm ngei ang, mahse thil engkim tibuaitu chu \halaite zel hi kan ni ti ila a sual tam lo hle ang. A tunlai, a chhuak thar apiang kan ît a. Chu kan ît zawng neih tum chuan, thawhchhuah nei si lovin, nu leh pate kan nawr tlut tlut a, rual kan ban phak loh hlau em em kan nu leh pate chuan hmangaih taka an lo chawi len an fate duhzawng tih sak thei lotu nih an hreh em em si. A tawp a tawpah chuan harsa tak chung pawhin min tih sak leh nge nge \hin.
     Chutihlaiin \halaite hi thil changkang lawm leh ngaisang tak mai kan ni si a, kan incheina te, kan chet vel dante kan inteh zung zung a, changkang kan tih chu kan ngaisang hle \hin a, thil \hing leh zeilo chu kan ngai theilo hle \hin a ni. Changkang nih kan duh a, \hing nih kan hlau hle \hin a ni. Huau huau kan lawmin, picnic leh party kan ngaina hle \hin. Tunlai tak leh zalen taka nun kan chak a, chu chakna chuan kan nunah tuihalna nasa tak a rawn thlen a, chu chuan mihring rilru dik tak ‘chin lem neih lohna’ chu a rawn kai harh ta \hin a ni. Chu nun tuihalna ngei mai chuan Sodom mipuite kha a lo tizauthau tawh a, chu zauthauna chuan kan Zoram ngei pawh hi Sodomism-ah min siam mek niin lang ta.
    Chu nun tuihalnain a tih zauthaute chuan a ‘vawrtawp’ thlen ngei an duh \hin a, chu chuan nâ taka nawrin theihtawp chhuahin chak leh duh zawng umin an tlan a. Mi tam tak chu ruihhlo lamah zuang lutin, chu an nun tuihalna tih reh tum chuan an bei a. Mahse, a reh thei lo a, a zual zel si. A tawpah chuan beidawngin patling an in dawm kun a, \halai duhawm tak tak, nu leh paten duat  leh hmangaih taka an lo enkawl leh beiseina nena an thlir \hinte chu ‘Ruihhlo’ vangin hman tlak lohvin mual an liam ta \hin a ni.  Ruihhlo bâwiha tang tawhte chuan tuihal rehna a awm lo tih an hre chiang leh zual thin a, thlah an duh a, an thei tawh silo, chhantu an mamawh ngawih ngawih \hin a ni. Zu leh drugs-te hi kan nih tur ang pawh min nih tir theilotu, zahpuiawm taka min siamtu zawk a lo ni si.
    Mi tamtak chu mipat hmeichhiatna lamtluangah an lo tlan mek bawk a. Tlangval a\anga paho thlengin condom hmelhriat satliah mai ni lo, a hman dan thiam leh hman nachang hria an pung telh telh a. Pathian thu anga chi thlah tumna aia mahni duh dan leh chakna hawia ‘chi thlauh’ thiam kan pung telh telh a. Kohhran dan khatna aia sex dan pakhatna duh zawk te, rai duh aiin rai duh lo te an pung telh telh bawk. Sâwn pai ngam khawpa huaisen a tlem telh telh laiin, sex-a fihlim chuang lova Biak in hawnga inneih hreh lo kan pung telh telh bawk. Sex video en tur heti taka a pun lai hian, sex video-a tel chak kan ngah tial tial bawk a ni. He hûrna sual hian Sodom khawpui a tih kan ral vek hnuah pawh, Lota leh a fate a dah nil chhunzawm leh a, Juda meuh pawh a fapate nupui lakah mualphona a’n khum leh a..... a, sawi tur a tam mai! Davida leh a chhungte sex vanga an mualpho nasat zia leh an thih phah nasat ziate kha kan sawi vek seng lovang.
    Inneihnain sex thianghlim min hlui laia hurna sual vanga innei kan tam ta zawk hian, Pathian tana mi \angkai fa min pe tlem telh telh a ni. Hurna sual hmanga thlarau sualin mih beih avang hian hurna satliah ni lo, hur herhna thlengin..... Awi ka rei, mipa leh mipe, patil leh nutil, pa leh fa, puitling leh naupang, Kohhran rawngbawltute leh Setana rawngbawltute thlengin hurna thlarau sual hian a rukin min thlun zawm duat a ni hi! Nimahse tuihal rehna a awm chuang silo, a bei nasa apiang an beidawng nasa a, an zauthauna chu a na tawlh tawlh si. Chu hurna thlarau sual chuan a man bet tlat tawh \hin si a ni.
    “Sum leh pai ber hi a lo ni e. Bible pawhin ‘Sumin engkim a si thlu,’a tia lawm”  tiin sum leh paiah kan in tlan siak a, a thim a var pawh thlu lovin kan tlan suau suau a, a dik a dawk pawh thlu lovin mahni kan in haivur a. Bible-in ‘Sum tamtak aiin hming\hat thlan tur a ni’  a tih laiin sum tam tak pawh ni lo, sum tlem tham pawh hming\hat ai chuan kan thlang zawk a. A  rah erawh chu ‘Mi hausa chuan a ngahna chu a muthilh loh phah ang’ tia Bible-in a sawi ang khanin mi hausate chuan an ngahna chu an muthilh theih loh phah mai ni lovin, an rumpui mek zawng a nih hi.
    Kan ram hi, changkanna thlipui chuan min nuai velin, chumi um chuan kan kal mup mup a,   nun hloh phah nan kan hmang fo \hin a, pawi tak a ni. Babel in sang satute ang chauh kha kan lo ni. Kan vanneihna tur emaw kan tih hi kan tan ‘thang leh fal’, boralna lamtluanga min hruai luttu zawk a lo ni si. Bible-in “Thil zawng zawng hi engmah lo leh thil lothlawn mai a lo ni”  tia a lo sawi ang khan, Israel lal ropui Lal Solomona meuh pawh khan “Khawi nge! Nuamsipbawl ka’n ching teh ang, a nuam teh reng emaw ka ti a.... Van hnuaia mihring fate dam chhûng tawite hman ral dan \ha ber a ni law maw tiin finna zawngin uain-a intihhlima nuam tawl ka tum ta a.... Ka hmaa Jerusalema lo awmte zawng zawng aia nasain.... Tin, ka mit itzawng apiang chu ka hlah lova, ka thinlung pawh eng lawmnaah mah ka sum lo”  a lo ti a. Mahse chu nuamsipbawl tuma a beihna leh a thawhrimna zawng zawngte chu engmah lo leh thil lothlawn mai a ni tih a hmu chiang em em a ni.  (Thuhriltu 2:1-26)
    Kei ni pawh, kan thlakhlelh thilte hi engmah lo mai atan kan dah phal lova, nun kan hloh phahna tur leh boralna lamtluanga min hnuk luttu tur a ni tih lah kan ring phal hek lo. Mahse nun kan hloh mek si a ni. Thufing pakhat chuan ‘Pawisa kan hloh chuan engmah kan hloh lova, hriselna kan hloh chuan thil thenkhat kan hloh a, nungchang kan hloh chuan thil zawng zawng kan hloh a ni’  tiin a sawi a, a dik hle awm e. A \ha lam kawng kan hria a, a \ha lo lam kawng pawh kan hria. Khawi zawk zawk pawh chu kan zawh thei a, chu chu kan duhthlannaa innghat a ni tih pawh kan hria. Nimahse, châkna tinrenga hruai bovin kan awm a, nunkhaw nawmna, hahchawlhna leh hringnun famkimna zawngin kan tlan a, hlimna tak tawng dawna kan inhriat laiin lungngaihna leh beidawnna bak kan hlawh chhuak \hin si lo a nih hi. Chuvangin kan chau a, kan tlu a, lungngaiin kan rum fo thin. Hetiang hunah hian kan mamawh tak kan hai fova, pan tur dik tak pan lovin kawng dang bawk kan zawh leh \hin. Hahchawlh kan mamawh a, thawk lak kan mamawh tih pawh kan inhria, mahse engtia thawk lak a, engtia hahchawlh tur nge tih erawh kan hre \hin si lo a nih hi.
    Hawh u, Zoram nghah fak dawntuaite u, sual kal sanin, hmatiang sawn zai i rel ang u. |hatna um a, Zoram tungding leh turin nang leh kei lo chu tudang mah an awm si lo.